Matt 13:31-33, 44-52 - Son 27 Jul 08

28 Julie 2008
Posted in Preke - Deon Binneman

Die Koninkryk bring ’n ingrypende verandering in ons lewe

Deon Binneman

Skriflesing: Mat 13:31-33; 44-52

Kindertyd:

Met die lenteblomme van Namakwaland is daar vir die kinders van die verandering wat die lente bring, vertel. Netso kan Jesus Christus ook ’n verandering in ’n mens se lewe bring. Die kinders is gevra om te dink aan iemand wat hulle ken in wie ’n mens hierdie verandering baie duidelik kan sien.

Inleiding:

Die meeste mense sal voorbeelde kan noem van mense wat hulle beskou as goeie voorbeelde van gelowiges wat geheel en al verander is deur die geloof. Vir my is Moeder Theresa ’n verstommende voorbeeld van iemand wat haar hele lewe gewy het aan dit wat vir haar belangrik was, dit wat haar hele lewe opgeëis het, naamlik die liefdevolle uitreik in die naam van Jesus Christus na die ellendigste van mense.

Nader aan ons het die lewe van Beyers Naudé my nog altyd ontroer. Hy en sy vrou het hulle lewe opgeoffer vir dit waarin hulle geglo het.

Die vyf kort gelykenisse:

Ons het vanoggend vyf kort gelykenisse gelees, nl die gelykenisse van die mosterdsaadjie, die suurdeeg, die skat in die saailand en die kosbare pêrel en van die treknet met die baie visse. Ons weet die bedoeling is om vir ons iets van die koninkryk van die hemel daarmee te verduidelik. Al hierdie gelykenisse beeld op een of ander manier die koninkryk van God uit. Daarom begin elkeen van die gelykenisse met "Die koninkryk van die hemele is soos..." . Jesus het sy hele aardse bediening gesien as die koms van die Koninkryk, die koms van God se heerskappy op aarde en in mense se lewe.

In Matteus 4:17 begin Jesus sy bediening met die oproep: Bekeer julle, want die koninkryk van die hemel het naby gekom. Deur sy woorde en dade het die koninkryk van God aangebreek, het die heerskappy van God in mense se lewe naby gekom: siekes is genees, blindes het gesien, en mense se lewe is ingrypend verander. Jesus verduidelik met wonderwerke, gelykenisse en preke dat die koninkryk van die hemel reeds aangebreek het en wat die aard en vereistes daarvan is. In Matteus word dit ook duidelik dat die koninkryk mense is, gelowiges wat die Koningskap van Jesus Christus aanvaar. Hy het gekom om ons na sy koninkryk te roep. Hy roep ons op tot ’n radikale keuse vir die koninkryk. Persone wat hierdie keuse maak, betree nie die koninkryk nie, maar is die koninkryk.

Die vyf kort gelykenisse wil vir ons leer dat die koninkryk van God op ’n manier iets is wat klein begin en baie groot word en ’n baie groot invloed het. Verder wil die gelykenisse ook leer dat die koninkryk kosbaar is en dat die besef van die waarde daarvan mense totaal opeis. Ons wil dus vanoggend op die volgende drie aspekte van die koninkryk fokus: Die koninkryk van die hemel het ’n bepaalde aantrekkingskrag; die koninkryk van die hemel het ’n veranderde effek; en die koninkryk van die hemel is kosbaar/waardevol.

Die koninkryk van die hemel het ’n bepaalde aantrekkingskrag:

Daar word deesdae baie kritiek op Christene en die kerk gelewer. Nie al hierdie kritiek is onbillik of onverdien nie. Dit bring soms mee dat Christene moedeloos en moeg raak. Die gelykenis van die suurdeeg wil nou juis gelowiges aanmoedig om die heerskappy van Jesus in hulle lewe uit te leef en ’n verskil te maak, hoe klein dit ook al mag wees. Die punt van hierdie gelykenis is juis dat die klein bietjie en aanvanklike onsigbare suurdeeg, ’n groot verandering teweeggebring het. Daarom groei die koninkryk. Dit is die groot verrassing van die koninkryk. Vir die wêreld is dit dalk klein en onsinnig, maar God self laat die koninkryk groei en groter word en Hy betrek ons om ander gelowiges nader te trek.

Die koninkryk van die hemel het ’n transformerende uitwerking:

Soos die suurdeeg het gelowiges ook ’n transformerende uitwerking op mense rondom hulle. Die koninkryk het egter ook ’n manier om gelowiges te verander. Iemand wat die koninkryk van die hemel verstaan, sal alles opoffer om dit hulle eie te maak. Of jy dit gesoek het of nie, of jy dit ontdek en of dit jou ontdek, die vreugde van die koninkryk is só groot dat dit jou hele lewe verander. Die gelykenisse van die pêrel en die man wat op die skat afgekom het, maak dit duidelik. As jy die heerskappy van die Here aanvaar, verander dit jou hele lewe. Dit is nie iets wat iemand onaangeraak laat nie. En al is ons dikwels so bewus van die onvolledigheid en die onvolmaaktheid van die verandering in ons, neem dit nie die wesenlike verandering wat daar wel plaasgevind het, weg nie. Want ons het tog ’n lewensrigting ontvang, naamlik nie ons belang nie, maar God s’n?

Die koninkryk van die hemel is kosbaar/waardevol:

Die gelykenisse van die skat in die saailand en die pêrel dui ook op die waarde van die koninkryk. Dit is so kosbaar dat gelowiges bereid moet wees om nou reeds volledig dissipels te wees. Die radikaliteit van dissipelskap kom nou sterk na vore. Jesus vra volledige toewyding, ’n bereidheid om alles op te offer. Die Bybel maak dit baie duidelik dat daar nie plek vir middelmatigheid in die koninkryk is nie. Maar dit beteken nie dit is net die grootstes, die suksesvolstes, hulle wie se name opgeneem is in die Wie’s Wie van die geloof wat hier vir ons iets kan leer nie. Nee, ek ken eenvoudige mense, nietige mense, wie se lewe duidelik van geloof en toewyding en die heerskappy van die Here spreek.

Die koninkryk is vir nou, nie net vir eendag nie:

As iemand meen die koninkryk van die hemel is net iets vir die toekoms, dan breek hierdie tekste nuwe moontlikhede oop. God is nou besig om die koninkryk te laat realiseer en gebruik koninkryksburgers in die proses. Ten spyte van weerstand, agterdog, mislukkings, ongeloof en vyandigheid kan gelowiges seker wees dat die koninkryk van die hemel reeds gekom het

Ten slotte:

Dit is verleidelik maklik om vanoggend te fokus op voorbeelde van groot en bekende gelowige mense soos moeder Theresa en Beyers Naudé en Billy Graham. Dit is voor die handliggend om voorbeelde van groot saamtrekke waar duisende gered word en waar wonderlik dinge gebeur, te noem. Maar dit sou ons blind maak vir miskien die sigbaarste tekens van die koninkryk, van God se heerskappy in mense se lewe. Ek wil eerder fokus op die klein tekens wat net so groot is. Ek dink aan ’n vrou wat ek nie baie in die kerk sien nie, ’n vrou met voorbeeldige kinders wat sê: Nee dominee, die verhouding met my man was van die begin af maar ongelukkig. Maar ek het by hom gebly, al die jare. Want ek is oortuig dit is wat die Here wou hê ek moet doen. Want wat sou ook van hom geword het sonder my? Ek dink ook aan iemand wat dit self nie breed het nie en wat R100 bring vir die truie wat ons vir die kinders wat sopkombuis toe kom, wil gee. Dit lyk vir my soos die heerskappy van die Here in mense se lewe, van die verandering wat die koninkryk bring.