Fil 1:27-2:4 - Die Gees van Christus verander ons gemeente tot vreugdevolle eensgesindheid

Geskryf deur Chris van Wyk | 05 Februarie 2012
Posted in Preke - Chris van Wyk

Wat hoor jy as jy die woord EENSGESIND hoor?

Presies dieselfde gesindheid?
Presies dieselfde gedagtes?
Presies dieselfde gevoelens?
Presies dieselfde gedrag?

Baie mense hoor die woord so, hou selfs daarvan, en veg daarvoor. En bewaar jou as jy nie dieselfde doen, dink of voel nie. Dan word jy en jou idees aangeval en verdag gemaak, sodat jy óf ingee óf uitgestoot word. Baie politieke sisteme is so. Selfs volksisteme en kulture funksioneer baie keer so. Eensgesindheid word verstaan as om presies dieselfde te dink ... en as jy durf verskil, dan verander jy van vriend in vyand.

Selfs in die kerk is dit soms so. Eensgesindheid word baie keer misverstaan as om dieselfde te dink, en om by die meerderheid se denke en gevoelens in te val. En mense wat anders doen, dink of voel word baie keer uitgestoot, meer as vyande hanteer as vriende binne dieselfde gemeenskap. En ongelukkig is dit baie keer dié tipe reaksies wat ons sien in die briewe in die koerante en in die groot uitsprake wat gemaak word. Mense wat eintlik met ‘n idee van eensgesindheid werk wat beteken almal moet presies doen, dink of voel soos hulle doen, dink of voel. En wee jou as jy durf verskil ...

Só ‘n verstaan van eensgesindheid is egter verdelend. Dit jaag mense uit mekaar, sommige op dié hoop en ander op daardie hoop. Dit skep vyandskap, baie keer tussen mense wat nie net van beter behoort te weet nie, maar mekaar ook boonop nodig het. Want ons almal het mos maar net ‘n deel van die waarheid beet, en ons het mekaar nodig, om uit almal se bydraes, almal se verskillende bydraes, ‘n beter prentjie van die waarheid, ook Die Waarheid, Jesus, te vorm.

Dit is immers waarom ons 4 evangelies het, en nie net 1 nie. Dit is waarom ons 13 briewe van Paulus het, en nie net 1 wat sommer vir almal sou gegeld het nie. Dit is waarom daar Konings en Kronieke is in die OT, wat min of meer dieselfde geskiedenis dek, net uit verskillende hoeke, en 150 Psalms en nie net 1 nie.

Verskillende perspektiewe vorm die volle prentjie van God se genade en die lewe wat Hy skenk.

Wat bedoel Paulus dus as hy hier in Filippense oor eengesindheid praat?

HIER VOLG DIE HELE EREDIENS Lewer kommentaar

Fil 1:1-11 - Die Gees verander ons gemeente deur kennis en ervaring - 22 Jan 2012

Geskryf deur Chris van Wyk | 22 Januarie 2012
Posted in Preke - Chris van Wyk

God is op twee maniere aan die werk in ons lewe. God is betrokke in die dinge wat ons ontwrig. En God is betrokke in die dinge wat ons bevestig. Dit is wat ons uit die verhaal van Filippi in Handelinge leer. God skep aan die een kant oortuigings by gelowiges deur die verkondiging van die evangelie, bv by Lidia, en bevestig hulle in die geloof. Maar Hy is aan die ander kant net so seer besig in die ontwrigtende gebeure in die stad, met die eienaars wat Paulus-hulle aankla oor die duiweluitdrywing uit die slafin, en die oproer onder die skare wat gesorg het dat die evangelie in die publieke ruimte ingedra is. Selfs die ontwrigtende aardbewing het bygedra tot die impak van die evangelie op en in die lewens van mense. Dit oortuig onder andere die bewaarder van God se teenwoordigheid en hy kom tot bekering.

In dit alles is God aan die werk – Hy ontwrig, en Hy bevestig, of ten minste Hy werk deur die ontwrigting en die bevestiging. Dit is waarom ons nie so gou ontsteld moet word as dinge deurmekaar word nie. Want God is daarbinne aan die werk.

Wat ons moet doen, is om te onderskei waaroor dit regtig gaan, wat God besig is om daarmee te sê, of daarmee te laat gebeur.

Hier volg die hele erediens met liturgie Kommentaar (2)

Eerste Kwartaal 2012

Geskryf deur Rethie van Niekerk | 13 Januarie 2012
Posted in Eredienste - Familiediens

Lewer kommentaar

Die Gees van Christus verander ons gemeente:

Geskryf deur Rethie van Niekerk | 12 Januarie 2012
Posted in Eredienste - Familiediens

Ons fokus tydens die eerste kwartaal van 2012 op die brief aan die Filippense:

Die Gees van Christus verander ons gemeente:

15/1	Hand 1	in ’n diverse gemeenskap Informele erediens
22/1	Fil. 1:1-11	deur ’n fyn aanvoeling
29/1	Fil. 1:12-26	tot vurige vrymoedigheid
05/2	Fil. 1:27-2:4	tot vreugdevolle eensgesindheid
12/2	Fil. 2:5-11	tot selfopofferende diensbaarheid
19/2	Fil. 2:12-18	tot ’n onberispelike lewenswandel
26/2	Fil. 2:19-30	tot gasvrye vriendskappe Belydenisaflegging \| Informele erediens
04/3	Fil. 3:1-4:1	tot geestelike volwassenheid Nagmaal
11/3	Fil. 4:2-9	tot blymoedige vrede
18/3	Fil. 4:10-23	tot liefdevolle omgee Afnaweek

Lewer kommentaar

Kleingroepe Eerste Kwartaal 2012

Geskryf deur Rethie van Niekerk | 12 Januarie 2012
Posted in Kleingroepe - Gemeenteselle

KLEINGROEPE word uitgenooi om kopieë van die boekie Gevorm deur die kruis by die Kerkkantoor te bestel @ R10. Groepe behandel dan elke Sondag se Skrifgedeelte in die voorafgaande week. Die boekie word nog afgerond vir publisering, so stuur asb. enige kommentaar vir Chris. As jy nog nie aan ‘n kleingroep behoort nie en graag by ‘n groep wil inskakel, skryf jou naam op die lys in die voorportaal of kontak vir Rethie.

Lewer kommentaar

Bybelskool Eerste Kwartaal 2012

Geskryf deur Chris van Wyk | 12 Januarie 2012
Posted in Didage - Bybelskool

Lees saam met ons hierdie kwartaal Paulus se vier briewe wat hy uit die gevangenis in Rome skrywe aan die gemeentes in Filippi, Kolosse en Efese, sowel as aan Filemon. Ons sluit af met sy drie pastorale briewe aan Timoteus en Titus. Die briewe aan die gemeentes in Filippi en Efese (Johannes het ook ‘n boodskap vir hulle in Open 2:1-7) sal ook in die lig van die uitvoerige verhale oor die stigting van dié gemeentes gelees word soos Lukas ons in die boek Handelinge vertel. Elke weeksdag is daar 'n bydrae by www.bybelskool.com, waar jy meer kan lees, jou kommentaar kan lewe, en ook jou vrae kan vra. Registreer by die bybelskool.com webtuiste om die bydraes ook elke weeksdag per e-pos te ontvang. Skryf in by die kerkkantoor - 0415835115 - indien jy die Bybelskool byeenkomste in die Konsistorie elke Woensdagaand wil bywoon om 18:30-19:30, vanaf 18 Januarie tot aan die einde van Februarie. Chris van Wyk

Lewer kommentaar

Lectio Divina Eerste Kwartaal 2012

Geskryf deur Rethie van Niekerk | 12 Januarie 2012
Posted in Didage - Lectio Divina

LECTIO DIVINA vanaf 18 Januarie Woensdae om 17:30 in die kerkgebou. Kom op jou eie en volg gewoon die instruksies op die skerm: word stil, luister na mooi musiek, oordink die week se Skrifgedeelte en antwoord in stil gebed. Rethie van Niekerk

Lewer kommentaar

Op pad met God Eerste Kwartaal 2012

Geskryf deur Mariette Rossouw | 12 Januarie 2012
Posted in Didage - Geestelike Gewoontes

By OP PAD MET GOD reis jy saam met medegelowiges op jou geloofspad. Hier sal jy op verrassende wyse vind hoe dissipelskap jou kan help om die werklikheid van God in jou lewe raak te sien, en hoe God met jou bemoeienis maak en met jou praat. In die lewe voor God, jou Vader, kry ‘n ontmoeting-met-Hom en ‘n aanraking-deur-Hom ‘n héél ‘n nuwe inhoud. Jy stap met verwagting hand-aan-hand met Jesus – elke dag.

Kom sluit gerus by ons aan as jy ‘n ware soeke na God het en geestelik wil groei, ‘n nuwe visie of geestelike tuiste soek, of gewoon net ‘n afplatting ervaar. Of kom kuier maar net ‘n bietjie by ons op jou reis deur 2012. Mariette Rossouw. (Geen koste)

Lewer kommentaar